ပြင်ဦးလွင်မြို့ရှိ ပွဲကောက်တိုးဂိတ် ဖျက်သိမ်း

 

 

မန္တလေး-လားရှိုးလမ်းပေါ်ရှိ ပြင်ဦးလွင်တိုးဂိတ် (ပွဲကောက်) လမ်းအသုံးပြုခ ကောက်ခံရေးစခန်းကို နိုဝင်ဘာလ ၁ ရက်နေ့ကစ၍ ဖျက်သိမ်းမည်ဖြစ်ကြောင်း ပြင်ဦးလွင်မြို့နယ် အထွေထွေ အုပ်ချုပ်ရေးမှူးရုံးနှင့် ပြင်ဦးလွင်ခရိုင် လမ်းဦးစီးဌာနထံမှ သိရသည်။

မန္တလေး၊ အောက်တိုဘာ ၃၀

မန္တလေး-လားရှိုးလမ်းပေါ်ရှိ ပြင်ဦးလွင်တိုးဂိတ် (ပွဲကောက်) လမ်းအသုံးပြုခ ကောက်ခံရေးစခန်းကို နိုဝင်ဘာလ ၁ ရက်နေ့ကစ၍ ဖျက်သိမ်းမည်ဖြစ်ကြောင်း ပြင်ဦးလွင်မြို့နယ် အထွေထွေ အုပ်ချုပ်ရေးမှူးရုံးနှင့် ပြင်ဦးလွင်ခရိုင် လမ်းဦးစီးဌာနထံမှ သိရသည်။

ယင်းလမ်းအသုံးပြုခ ကောက်ခံရေးစခန်းသည် မဟာအံ့ထူးကံသာ ဘုရားနှင့် ပွဲကောက်ရေတံခွန်တို့နှင့် နီးခြင်း၊ ပြင်ဦးလွင်မြို့တွင်းမှ နာရေးယာဉ်များ သုသာန်သို့သွားရာတွင် တိုးဂိတ်ကို ဖြတ်သန်းသွားလာရခြင်း၊ လေးလမ်း သွားလမ်းအဖြစ် တိုးချဲ့ရန် နေရာကျဉ်းမြောင်းခြင်း စသည်တို့ကြောင့် ယာဉ်ကြော ရှုပ်ထွေးမှုများ ရှိသဖြင့် ဖျက်သိမ်းရခြင်းဖြစ်ကြောင်း ပြင်ဦးလွင်ခရိုင် လမ်းဦးစီးဌာန တာဝန်ရှိသူတစ်ဦးက The Voice Daily သို့ အတည်ပြု ပြောကြားသည်။ 

ပိတ်ချင်းမြောင်ဘုရားသို့ သွားသောယာဉ်များအနေနှင့် ဝက်ဝံ-ဘန့်ဘွေး လမ်းပိုင်း (နောင်ချို) ဂိတ်အထိ လမ်းအသုံးပြုခ ပေးဆောင်ရကြောင်း၊ ယခုကဲ့သို့ ပွဲကောက်ဂိတ် ဖျက်လိုက်ခြင်းဖြင့် စရိတ်သက်သာသွားမည်ဖြစ်ကြောင်း မန္တလေး-မူဆယ် ယာဉ်မောင်းတစ်ဦးဖြစ်သူ ဦးဘိုသိန်းက ပြောကြားသည်။

ပြင်ဦးလွင်သုသာန်သည် မြို့ပြင်တွင်ရှိသဖြင့် နာရေးပို့ဆောင်သောယာဉ် တန်းကြောင့် ယာဉ်ကြောကျပ်တည်းမှုများ ကြုံရကြောင်း၊ ဂိတ်အနေအထားအရ လေးလမ်းသွားမဟုတ်ဘဲ နှစ်လမ်းသွားသာဖြစ်သဖြင့် အချိန်နှောင့်နှေးမှုများလည်း ကြုံရကြောင်း၊ ယခုကဲ့သို့ ဖျက်သိမ်းလိုက်ခြင်းဖြင့် ယင်းပြဿနာများကို ဖြေရှင်းပြီး ဖြစ်သွားနိုင်ကြောင်း အဆိုပါလမ်းပိုင်းတွင် သွားလာနေသော ယာဉ်မောင်းများက ပြောဆိုသည်။ 

“အဝေးပြေးကားသမားတွေအတွက်လည်း ကောင်းတယ်။ ဘုရားဖူးယာဉ်တွေအတွက်လည်း ကောင်းသွားမယ်။ လမ်းအသုံးပြုခ ပေးရတာချင်း အတူတူ ခရီးမတွင် ဖြစ်ရတယ်။ ဂိတ်နည်းလေကောင်းလေပဲ”ဟု ဦးဘိုသိန်းက ထပ်လောင်း ပြောကြားသည်။

ပြင်ဦးလွင် လမ်းအသုံးပြုခ ကောက်ခံရေးစခန်း (ပွဲကောက်) ဖျက်သိမ်းလိုက်သော်လည်း ပြင်ဦးလွင် ကျောက်ချောဂိတ် အနေနှင့် ယခင်က ၂၄ မိုင်အတွက်သာ ကောက်ခံခဲ့ရာမှ ယခု ၃၉ မိုင်အတွက် လမ်းအသုံးပြုခ ကောက်ခံမည်ဖြစ်ကာ ဝက်ဝံ- ဘန့်ဘွေး (နောင်ချို) ဂိတ်အနေနှင့် ယခင်က ၂၃ မိုင်အတွက်သာ ကောက်ခံခဲ့ရာမှ ယခု ၃၂ မိုင်အတွက် နိုဝင်ဘာလ ၁ ရက်နေ့ကစ၍ အစားထိုး ပြင်ဆင်ကောက်ခံမည်ဖြစ်ကြောင်း ပြင်ဦးလွင်ခရိုင် လမ်းဦးစီးဌာနထံမှ သိရသည်။