သာကေတမြို့နယ်မှာ လူအုပ်စုကို ကားဝင်တိုက်၊ သုံးဦးသေဆုံး
သာကေတမြို့နယ်၊ ဧရာဝဏ်လမ်းရှိ ထူပါရုံမှတ်တိုင်နားမှာ နိုဝင်ဘာလ ၅ ရက် မနက် ၁ နာရီခွဲလောက်က လမ်းဘေးက အမျိုးသား ခုနစ်ဦးကို လိုက်ထရပ်ယာဉ်တစ်စီးက အရှိန်လွန် ဝင်တိုက်မိခဲ့လို့ ယာဉ်တိုက်ခံရတွေထဲက အမျိုးသားသုံးဦးမှာ အခင်းဖြစ်နေရာတွင် ပေါက်ပြဲပွန်းပဲ့ ဒဏ်ရာတွေနဲ့ သေဆုံးခဲ့တယ်လို့ မြန်မာနိုင်ငံယာဉ်ထိန်းတပ်ဖွဲ့ကနေ သိရပါတယ်။
ဒေါပုံမြို့နယ်၊ နွယ်အေးရပ်ကွက်မှာ နေထိုင်တဲ့ အသက် ၅၂ နှစ် ယာဉ်မောင်း ဦးစိုးနိုင် (ခ)သန်းဝင်းမှာ လိုက်ထရပ်ယာဉ်ကို ဧရာဝဏ်လမ်း အတိုင်း မောင်းလာတုန်းမှာ ထူပါရုံမှတ်တိုင် အလွန် ၏အရှိန်မထိန်းနိုင်ဖြစ်ပြီး ညာဘက်လမ်းဘေးမှာ လမ်းလျှောက်နေတဲ့ အမျိုးသား ခုနစ်ဦးကို ဝင်တိုက်မိခဲ့တာပါ။
“လိုက်ထရပ်ကားက အရှိန်နဲ့ မောင်းလာရာက လူတွေကို ဝင်တိုက်မိတာ။ သေသွားတဲ့ သုံးယောက်ထဲက နှစ်ယောက်ဆို ဗိုက်တွေ ခေါင်းတွေပါ ပွင့်ထွက်သွားတာ”လို့ အခင်းဖြစ်ပွားတဲ့နေရာကို သွားရောက် စစ်ဆေးခဲ့တဲ့ ရဲအရာရှိတစ်ဦးက ပြောပါတယ်။
ယာဉ်တိုက်ခံရတဲ့ အမျိုးသားခုနစ်ဦးမှာ အသက် ၃၀ နှစ်ဝန်းကျင်ရှိ အမည်မသိ အမျိုးသားတစ်ဦး၊ အသက် ၂၅ နှစ် ကိုငယ်လေးနဲ့ အသက် ၄၅ နှစ် ဦးမိုးအောင် (ခ) မိုးလေးတို့က အခင်းဖြစ်ပွားတဲ့နေရာမှာ သေဆုံးခဲ့ပြီး ကျန်လေးဦးက ရန်ကုန်ပြည်သူ့ဆေးရုံကြီးမှာ အတွင်းလူနာ (စိုးရိမ်ရ)အဖြစ် တင်ပို့ထားရတယ်လို့ သိရပါတယ်။
ယာဉ်မဆင်မခြင် မောင်းနှင်သူ ယာဉ်မောင်း ဦးစိုးနိုင် (ခ) သန်းဝင်းကို သာကေတမြို့မ ရဲစခန်းက ရာဇသတ်ကြီး ပုဒ်မ ၃၀၄-က (ပေါ့လျော့ခြင်းဖြင့် သေစေမှု) အပါအဝင် ပုဒ်မ ၄ ခုနဲ့ အမှုဖွင့်ပြီး ဖမ်းဆီး အရေးယူထားတယ်လို့ ရဲတပ်ဖွဲ့ထံမှ သိရပါတယ်။
Credit: Duwun
- Get link
- X
- Other Apps
- Get link
- X
- Other Apps
Comments